~सुनिल कोइराला
तिमी खुसी छौ, खुसीमा मजा छ
तर याद गर
यो समय बित्नेछ ।
तिमी दुःखि छौ, दुःखमा पीडा छ
तर याद गर
यो समय बित्नेछ ।
तिमीले चाहेर सुखको पल रोक्न सक्दैनौ
तिमीले चाहेर हर उत्सवसँगै बोक्न सक्दैनौ
तिमी राम्रो छौ, राम्रो हुनुमा मजा छ
तर याद गर
यो समय बित्नेछ ।
दुःख छ, पीडा छ, शोक छ जीवनमा
तिमी यसलाई देख्न सक्दैनौ
वेदना, वियोग र विछोड छ जीवनमा तिमी यसलाई छेक्न सक्दैनौ
तिमी नराम्रो छौ, नराम्रो हुनुमा पीडा छ
तर याद गर
यो समय बित्नेछ ।
आज मेरो सबै छ, आज मेरा सबै छन्
मलाई थाहा छ यो समय बित्नेछ
कुनैदिन म एक्लो हुनेछु, मेरा कोही हुने छैनन्
मलाई थाहा छ
यो समय बित्नेछ ।
समय रोकिए हुन्थ्यो, रोकिन्न
समय नबिते हुन्थ्यो, बित्छ
मेरा मित्र
एकदिन समयसँगै हामी बित्नेछौं
हामीसँगै समय बित्नेछ ।
अनि फेरी युगले भन्नेछ
यो समय बित्नेछ ।
