नव वर्ष २०८१ को शुभकामना

~शोभा पाण्डेय सिलवाल 

घुमिफिरी असी गयो एकासी साल आयो

सब जनामा नयाँ जोश उमङ्गले छायो ।

बिघ्न बाधा हटी जाओस् पुरानोका सबै

हातेमालो  गर्दै अघि  बढौँ  नयाँ सालमा लहै ।

एक अर्काको हृदयमा सद्भावना छाओस्

हत्या हिँसा कुसंस्कारको जालो तोडी जाओस् ।

वसन्त बहार जस्तो बनोस् नयाँ वर्ष

तीन कोटी नेपालीमा छाओस् सदा हर्ष ।

उद्देश्य र नियत सबको निर्मल नै बनून्

तेत्तीस कोटी देवताले सबको रक्षा गरून् ।

मनको चाह पूरा होओस् दिँदा नसकियोस्

फलको आशा नगरियोस् कर्म सबले गरोस् ।

मन सबको शान्त रहोस् यो एकासी सालमा

तुफानलाई झेल्ने शक्ति मिलोस् जीवनमा ।

फूल जस्तै फुल्न सकोस् जीवन नेपालीको

सुवास बनी छर्न सकून् वासना सुगन्धको ।

पाइला सदा अघि बढून् सगरमाथा चुम्न

कुरीति र कुसंस्कारलाई उखेलेर फाल्न  ।

वसन्त ऋतुमा फूल फुल्यो जमुना

एकासी सालको छ शुभकामना  ।