रेडियो कान्तिपुरको २४ औँ वार्षिक उत्सवका अवसरमा पाँचौँ नेसनल म्युजिक अवार्ड-२०७९ का विजेता कलाकारहरू सम्मानित भएका छन् ।
रेडियो कान्तिपुरको २४ औँ वार्षिक उत्सवका अवसरमा आज एक कार्यक्रम गरी उत्कृष्ट स्रष्टाहरुलाई अवार्डसहित सम्मान गरिएको हो । गीत-संगीतका साधक यादव खरेललाई एक लाख नगदसहित लाइफ टाइम अचिभमेन्ट अवार्डले सम्मान गरिएको छ ।
त्यसैगरी विभिन्न गीत संगीतका १५ विधामा छनोट भई विजेता बनेका नव गायक, रचनाकार, संगीत निर्देशक, उत्कृष्ट लोकदोहोरी गायक सम्मानित भए ।
साथै, उत्कृष्ट राष्ट्रिय गीतसहित उत्कृष्ट साङ्गीतिक समूहसमेत सम्मानित भएका छन् । कार्यक्रममा अवार्ड वितरण गर्दै कान्तिपुर मिडिया ग्रुपका अध्यक्ष कैलाश सिरोहियाले गीत संगीतको क्षेत्रमा योगदान पुर्याउने स्रष्टाहरुको समानका लागि कान्तिपुर मिडिया ग्रुपले नेसनल म्युजिक अवार्ड कार्यक्रम आयोजना गर्दै आएको बताए ।
कार्यक्रममा उत्कृष्ट नवगायकतर्फ गायक सुरज पण्डित सम्मानित भएका छन् । उत्कृष्ट रचनाकारमा हर्क साउद छनोट भए भने संगीत निर्देशक विधामा हरि लम्साल छानिए ।
विभिन्न गीत संगीतका १५ विद्यामा ७५ जना स्रष्टा तथा कलाकारहरू छनोटमा परेका थिए ।
त्यसमा उत्कृष्ट ठहरिएका १५ जना कलाकार र एकजना लाइफ टाइम अचिभमेन्ट विजेता गरी १६ जना स्रष्टा तथा कलाकार रेडियो कान्तिपुर नेसनल म्युजिक अवार्डबाट सम्मानित भएका छन् । कार्यक्रममा विभिन्न कलाकारहरुले सांगितक प्रस्तुति दिएका थिए ।
पुरा कार्यक्रमको भिढियोः
भिडियो सौजन्यः कान्तिपुर मिडिया ग्रुप
