बाटो हो … रोजाइ तिम्रै !

बाटो हो

ढुङ्गैढुङ्गा छ त के भयो

नाघ्न, फड्किन सक्छौ

छल्न, तर्किन सक्छौ

यत्ति हो – तिम्रो विवेक जाँच्दैछ यसले

सम्हालियौ – रोमाञ्च दिन्छ

हतारियौ – ठोक्किन्छ घुँडा, दर्फराउँछ कुहुनु

रोमाञ्च रोज्ने कि पीडा

धैर्य रोज्ने कि आवेग

रोजाइ तिम्रै !

सक्छौ भने

एक्कैछिन यहीं बस, थकाइ मार

र, नियाल प्रकृतिको लय

त्यतिखेर

ढुङ्गैढुङ्गाको यो उबडखाबड

फूलैफूलको पाउदानी लागेन भने मलाई भन्नू ।