एभरेष्ट प्रिमियर लिग क्रिकेट इपीएलमा पोखरा राइनोज फाइनलमा प्रवेश गरेको छ ।
बिहीबार भएको क्वालीफायरमा भैरहवा ग्लाडियटर्सलाई ७ विकेटले पराजित गर्दै पोखराले फाइनल यात्रा तय गरेको हो । फाइनलमा पोखराले उपाधिका लागि चितवन राइनोजसँग खेल्ने छ । चितवनले पहिलो क्वालीफायरमा पोखरालाई पराजित गर्दै यसअघि नै फाइनलमा स्थान बनाएको थियो ।
१२० रनको लक्ष्य पछ्याएको पोखराले १० बल बाँकी छँदै ३ विकेट गुमाएर पुरा गरेको थियो ।
त्रिवि क्रिकेट मैदान कीर्तिपुरमा टस हारेर पहिला ब्याटिङ गरेको भैरहवाले निर्धारित ओभरमा ६ विकेट गुमाएर ११९ रन मात्रै बनाउन सक्यो । यसअघि ब्याटिङमा उत्कृष्ट रहेको भैरहवाको टिमले पोखराविरुद्ध भने खुलेर रन बनाउन असफल रह्यो । –रासस
