भावना शर्मा
रातै मीठो साथै मीठो मायालुको बातै मीठो
मनदेखि तनसम्म यो मायाको जातै मीठो ।
नजिकिँदै लजाउँदै एक–अर्कामा हराउँदै
मुटु साटी लगाउने मायाको यो नातै मीठो
मनदेखि तनसम्म यो मायाको जातै मीठो ।
रिसाउँदा फकाई–फकाई मनको सारा थकाइ
बग्दा आँसु माया गरी पुछिदिने हातै मीठो
मनदेखि तनसम्म यो मायाको जातै मीठो ।
स्पर्शले मात्र पनि शरीर उसै थर–थराउने
मायालुको साथ भए लाग्छ सारा रातै मीठो
मनदेखि तनसम्म यो मायाको जातै मीठो ।
दुःख–सुख जेजे मिल्छ मिली कटाउँला भनी
जिन्दगीभर साथ दिने मायालुको साथै मीठो
मनदेखि तनसम्म यो मायाको जातै मीठो ।
