विश्वभरि एकैदिनमा अहिलेसम्मकै सबैभन्दा बढी कोरोना भाइरसका सङ्क्रमितको पुष्टि भएको छ । विश्व स्वास्थ्य सङ्गठनका अनुसार आइतबार पछिल्लो २४ घण्टामा एक लाख ८३ हजार नयाँ सङ्क्रमित थपिएका छन् । उक्त सङ्ख्या चौबिस घण्टाभित्र नयाँ सङ्क्रमित पुष्टि भएको अहिलेसम्मकै सबैभन्दा उच्च हो ।
संयुक्त राष्ट्रसङ्घको स्वास्थ्य सम्बन्धी निकायले ब्राजिलमा सबैभन्दा बढी सङ्क्रमित फेला परेको जनाएको छ । ब्राजिलमा आइतबार चौबीस घण्टाभित्र ५४ हजार ७७१ नयाँ बिरामी पुष्टि भएका छन् । संयुक्त राज्य अमेरिकामा ३६ हजार ६१७ र भारतमा १५ हजार ४०० नयाँ सङ्क्रमित थपिएका छन् ।
स्वास्थ्य सङ्गठनका विज्ञहरूले भारी सङ्ख्यामा सङ्क्रमित पुष्टि हुनुका पछाडि थुप्रै कारण हुनसक्ने जनाएको छ । परीक्षण बढी भए सङ्क्रमित हुने स्वतः बढ्ने र सङ्क्रमण अझै बढी फैलिने क्रम रहेको विज्ञहरूले दुई थरीका तर्क गरेका छन् ।
विश्व स्वास्थ्य सङ्गठनले हालसम्म ८७ लाख ८ हजार आठ जना सङ्क्रमित भएको जनाएको छ । विश्वभरि चार लाख ६१ हजार ७१५ जनाको मृत्यु भएको छ । पछिल्लो चौबीस घण्टामा चार हजार ७४३ जना सङ्क्रमितले ज्यान गुमाएका छन् ।
